Psalmi 147
Biblia Sacra › Psalmi › caput 147
1Alleluja. Lauda, Jerusalem, Dominum ; lauda Deum tuum, Sion.
2Quoniam confortavit seras portarum tuarum ; benedixit filiis tuis in te.
3Qui posuit fines tuos pacem, et adipe frumenti satiat te.
4Qui emittit eloquium suum terræ : velociter currit sermo ejus.
5Qui dat nivem sicut lanam ; nebulam sicut cinerem spargit.
6Mittit crystallum suam sicut buccellas : ante faciem frigoris ejus quis sustinebit ?
7Emittet verbum suum, et liquefaciet ea ; flabit spiritus ejus, et fluent aquæ.
8Qui annuntiat verbum suum Jacob, justitias et judicia sua Israël.
9Non fecit taliter omni nationi, et judicia sua non manifestavit eis. Alleluja.
Vulgata Clementina (1592) — S. Hieronymus ; éd. clémentine. Fons : seven1m/open-bibles. Domaine public